Skip to content

Trans Ísland Posts

Kynsegindagurinn 2017

Bóndadagur og konudagur hafa verið haldnir hátíðlegir síðan um miðja 19. öld með svipuðum hætti og við þekkjum í dag. Áður tíðkaðist jafnvel að halda upp á yngismeyja- og yngissveinadag á sama hátt, en allir þessir dagar tengdust gamla dagatalinu okkar og var því breytilegt hvaða dag ársins þá bar upp miðað við okkar tímatal.

Síðustu tvö ár hafa Kynsegin Ísland og Trans Ísland haldið hátíðlegan kynsegindag, en hann er viðbót við bónda- og konudag og er nú haldinn síðasta dag einmánuðar, eða síðasta vetrardag. Með því að halda upp á þennan dag vonumst við til þess að hefð skapist fyrir því að bjóða kynsegin ástvinum mat, blóm eða annað fallegt og að sú hefð verði jafn sjálfsögð og hefðir konu- og bóndadagsins.

En hvers vegna er þörf á nýjum degi?

Á síðustu árum hefur kynsegin fólk loksins eignast orð til að lýsa því hvernig það upplifir sig. Þetta þýðir að sjálfsögðu ekki að þessi hópur hafi ekki verið til áður, heldur eingöngu að hann átti engin orð til að tala um sig og var þess vegna ósýnilegur. Í dag er tilvist kynsegin fólks loksins komin fram á sjónarsviðið og kynsegin einstaklingar geta nú talað um kynvitund og kyngervi sitt eins og það er, án þess að þurfa að sætta sig við það að rangkynja sjálft sig til þess eins að fá að vera með í samfélaginu.

Ný persónufornöfn eins og hán, hín og hé hafa rutt sér rúms í tungumálinu og slík viðbót er gríðarlega mikilvæg til að skapa rými fyrir fólk sem tilheyrir ekki einungis kvenkyni eða karlkyni. Betur má þó ef duga skal og þess vegna viljum við bæta kynsegindeginum við þessa gömlu hefð. Þegar tungumálið og hefðirnar hafa samþykkt kynsegin fólk sem eðlilegan hluta samfélagsins mun það auðvelda öðrum að samþykkja kynsegin fólk. Með þessu móti getum við gert samfélag okkar opnara og gert það að verkum að hópur fólks mun ekki finna fyrir þörf til að bæla mikilvægan hluta af sjálfu sér til að falla í hópinn.

Gleðilegan kynsegindag!

Comments closed

Aðalfundur 2017

Aðalfundur félagsins var haldinn í dag og ný stjórn kosin inn, en hún er svohljóðandi:

Formaður – Alda Villiljós
Varaformaður – Guðrún Sæborg
Gjaldkeri – Davíð Illugi
Ritari – Saga Eir
Meðstjórnandi – Vallý

Fulltrúar félagsins í trúnaðarráð Samtakanna ’78 eru Alexander Björn og Halla Katla.

Frekari upplýsingar um stjórnarmeðlimi og netföng verða uppfærð á síðunni á næstu dögum en sem og alltaf er hægt að hafa samband við stjórnina á netfangið stjorn@transisland.is

Við þökkum fráfarandi stjórn kærlega fyrir vel unnin störf og hlökkum til að taka þátt í félagsstarfinu næsta árið!

Kveðja,
Stjórnin

Comments closed

Kall eftir framboðum

Kæra félagsfólk

Við hvetjum ykkur til að bjóða ykkur fram til stjórnar Trans Íslands þann 18. febrúar næstkomandi. Þar sem mörg okkar úr stjórn ætlum ekki að bjóða okkur fram aftur þá er þetta gullið tækifæri til að gefa af sér til samfélagsins.

Félagið hefur aldrei verið fjársterkara og ýmis yfirstandandi verkefni í gangi sem þurfa á nýju blóði að halda, t.d. gerð fræðslubæklings, landsfundur trans fólks og margt fleira. Einnig eru hér tækifæri til að vinna með alþjóðlegum samtökum á borð við IGLYO og TGEU sem felur í sér að mæta á ráðstefnur erlendis og er það að langmestum hluta niðurgreitt. Auk alls þessa er vert að minnast á vinnuferð stjórnar sem er ávallt lærdómsrík og skemmtileg og gefur stjórn tækifæri á að kynnast og undirbúa sig fyrir nýtt starfsár.

Ef þú hefur áhuga á að vera með í stjórn, sendu okkur póst á stjorn@transisland.is með framboðsyfirlýsingu.

Leitast er eftir framboðum í öll embætti: Formann, varaformann, meðstjórnanda, gjaldkera og ritara.

Smelltu hér fyrir viðburðinn fyrir aðalfundinn á Facebook!

Comments closed

Leitum að nýjum stjórnarmeðlim!

Stjórninni finnst leitt að tilkynna að Sandra Rós hefur þurft að stíga niður úr stjórn af persónulegum ástæðum, en vegna þessa erum við að leita að einhverjum sem er til í að taka sæti í stjórn fram á vor. Ef þú hefur áhuga, endilega sendu okkur póst á stjorn@transisland.is fyrir 1. janúar og segðu okkur aðeins frá þér og/eða af hverju þú myndir vilja vera í stjórn!

Á næsta félagsfundi, þann 4. janúar, munum við síðan kjósa um nýjan meðlim í stjórn og því mikilvægt að þið sendið póst tímanlega. Hlökkum til að heyra frá ykkur og sjáumst hress á nýju ári!

Comments closed

Trans Ísland 2017 Almanak

Jólagjöfin í ár er loksins komin.

Trans Ísland hefur ákveðið að gefa út almanak fyrir árið 2017 og inniheldur um 14 ljósmyndir af hinsegin fólki í trans samfélaginu á Íslandi. Allar myndir teknar af Öldu Villiljós. Almanakið hefur í fórum sér skrá yfir alla helstu alþjóðlegu hinsegin daga sem og almenna frí- og hátíðardaga.

Þessi fágæti gripur fæst á litlar 2500,- krónur eða 2000,- krónur fyrir félagsfólk sem hefur greitt félagsgjöld Trans Íslands. Ágóðinn af sölu almanaks fer svo í að styrkja Trans Ísland og þau verkefni sem félagið vinnur að til að styrkja stöðu trans fólks á Íslandi.

Hafið samband við Trans Ísland til að fá upplýsingar um hvar hægt er að nálgast dagatalið.

dagatal

Comments closed